اتحاد المدونين الليبين اضغط هنا لزيارة الموقع الرسمي

شنو اللي صاير في ليبيا؟

كتبهاغيداء التواتي ، في 4 يونيو 2009 الساعة: 01:37 ص

 

 

مساء الخير أحباء شواطئ          

 

 

 

 

موضوعي اليوم الأكيد الكل  حاس بيه وعاشه في بلادنا موضوع يبان إنه تجاوزات فردية بس أنا نحس فيه الموضوع بدي مستفحل وكاثر لين خلاص المفروض الواحد لازم  يطرحه  للنقاش، على الأقل مرات نلقو حل ليه

 

الموضوع او مجموعة المواضيع هي

 

انعدام الثقة بين الناس   والقلابة (مفردة ليبية شبابية وتعني النصب)  وصحة الوجه يعني ياخذ منك حاجتك ويعن تبكي وعين تضحك

 

 وهو وجهه (زي شبشب التليك)( نوع من الأحذية القديمة التي لا تبيد أبدا مصنوعة من الفضة  في إشارة  لهذا الشخص بأنه لا يستحي)

 

واحد يقولي اي نوع ثقة؟

نقولك

 

كل أنواع الثقة

 

 اللي تخطر في بالكم

ومنها

 

من تتكلم أنت وحد وعاطي فيه ثقة مش حياخذ سرك لبرا وتلقاه ثاني يوم زي خالتك بلبولة؟ اللي في فمها تقوله(مثل ليبي)

 

 

 

 

من تسلف حد فلوس   يقولك بس نهاية الأسبوع وعوينتك تسلم من العمي؟.

 

الحق صارتلي واجد لأني نحب نفك ضيقة الناس بس(شعفوووووفة كان مزال سلفت حد) آخر مرة سلفت فيها ناس قالولي أسبوع ردوهملي أمس بس  بعد 6 شهور ، وبعد مصححت وجهي وقلت معدش فيها يابنت هادو مش 10 ولا عشرين خذيتهم وحقي وتقول انشحت منهم زيادة وهديكا الشبحة عالجنب خيرك طايرة عليهم!!!

 

 

 

من تسلم باسورد موقعك لشخص  باش يساعدك وتعطي فيه الثقة وتلقاه لاعب في الموقع  شلابودي(  شلابودي كلمة طرابلسية قديمة منعرفش معنها بس ديما نسمع فيها من يلقى واحد حاجة ملخبطة هئ)

 

 

 

 

 

 

من  تدير شغل لحد وعابي على روحك تبي تاخذ حق جهدك وعرقك وتعبك.

  وأنت مداير روحك  جنتل و تقول  بينك وبين نفسك ماتجيش الماديات بينا خليها بالثقة توة يعرف بروحه ويخلصك آخر يوم

 

ودورة تقعد تجري في جرته تقول  قرانديزر باش تدور حقك، وفي الأخير يطلعك أنت غالط ومتنفعش و طماع وتلقى فلوسك عند ه مدكنات قريب عام ولا أكثر

 

هئ نتفكر فيها مرة صارتلي مع ناس من هالشعب وكل منقوللهم راهو عليكم قريب 300 دينار يقولولي باهي احنا مش في طرابلس وقتها كان الموبيل غشة هئ (قديمة الكلمة)

قتلهم هما تحتكم الفلوس قالولي ايه قتلهم باهي  بحداكم محل موبيلات !

 

هئ فرحوا يحسبوني بنقوللهم اشرو بيهم جهاز هئ قالولي ايه قتلهم ترا بالله عليكم اشرولي 3 كروت متع 100(ياحسرة أيام كروت المدار مفيس إلا 50 و100)

 

 

 

 

وابعتولي الأرقام في رسالة

 

 

 

 

 

 

تعرفوا  الحركة هادي انجنوا منها قريب جتهم جلطة كيف وكيف نطلع فالحة وناخذ حقي شنو يعني تبوني نصكت باش تقولوا عليا مسكينة وياناري

بصراحة انا منسيبش في حقي عند حد ومناخدش في حق حد وبالعكس يخي نكرم في اي حد يقدملي خدمة بمقابل ونعطيه فوق مايطلب لأنه هذا حق ومن أهم تعاليم ديننا إننا نأدو الأمانات لأهلها

 

 

 

  وحي ياحي  قداش ناس واكلة حق ناس  ويجيك واحد يقولك معنديش والله غالب  وتلقاه شاري ومتسوق بفلوس أكثر من اللي تبيهم منه

عيني عينك وزيادة يقولك شوف شنو شريت!!!

و يديرها بضحكة ولعبة (قلابة) يحساب روحه هو بس حناه ليبية اصل ومفصل

 

هادي  تعتبر إهانة توجعك الضحكة عليك   مش الفلوس لذلك نصيحة لازم لو قابلتكم اشكال  زي هادي تربوهم لأنكم لو انتو سيبتو حقكم عندهم  تعجبهم اللعبة ويعاودوها مع غيركــم

 

 

 

 

من تخلي سيارتك برا عابي على روحك بتطلع تلقاها مفيها شي  وأمورها تمام ،تلقى   كمشة من الغوغاء الي خارطها واللي محصل فيها بونية

 

ويقولك معلش سامحنا وين يصرفو فيها مش عارفة وين؟ 

 

 يقولك الطريق ضيقة ميترو وهو مخلي جبنه فراغ يفوت مدمرة حربية

 

 

الحسد اللي تكلمت عليه قبل

 

 

 

(اضغط هنا لتقرأ التدوينة بخصوص الحسد) واللي أعوذ بالله  من هالمرض يخلي ناس مريضة بيك تدورك وين ما أنت وفي جرتك شادينها تقول لا واخذ ورثة بوهم ولا قاعد في حوشهم ولا يصرفو عليك ولا عايشة تحت كفهم ولا أنت سبب فشلهم

 

 

 

 

 

شنو ذنبك لو كنت ناجح وهما فاشلين لازم تكون زيهم؟ باش يرضوا  عليك

 

 

 

 

 

الغش في كل شي في ليبيا بدي زي صباح الخير

 

 

 

 

 

من تبي تدير حاجة بدي اي حد يقولك رد بالك 

 

 

 

 

 

نرد بالي من شنو؟

 

 

 

 

 

يقولوك من كل شي

 

 

 

 

 

تبي تدير ورق في  أي مكتب خدمات  تجنبا للتشحوير والزحمة تلقى نصهم مقالبية ومزورين!!

 

 

 

 

 

تتكلم أنت وحد وتاخذ منه كلمة  ثاني يوم تلقاها تغيرت!!

 

 

 

 

ماشي لا بيك لاعليك تلقى نصابين في الطريق زي النمل أشكال وأنواع

 

 

شنو غير عالشعب اللي كان طيب زمان ؟

 بدت ظواهر ثانية الكل يحذر فيا!!!

 

 

 

 

صكري بطم بيبان  سيارتك راهو بدو يديرو في حركة يفتحو الباب وانتي واقفة في سميفاور ويركبو عادي ويفتحو موس ويقولوك هاتي اللي عندك!! الصراحة انصدمت

 

 

 

 

 

سألتهم في ليبيا قالولي اي في ليبيا مالا وين؟

 

 

تررم تررم تررم

يعني شنو  لازم  ندور وسيلة حماية زي العصي اللي معبية السوق توة(عصا كهربائية تصدر شرارة تلامس يد أو جسد اي شخص يحاول الأقتراب منك )

 

 

 

 

  لازم ندير وحدة في سيارتي باش لو حد قرب جيهتي تعتبر وسيلة للدفاع ولا  ندير بودي قارد وراي ولا معدش فهمت!!!

 

 

بديت نراقب في تصرفات الليبين لاحظت  إنها تغيرت ونقلبت للأسوأ واللي تحسابه كبير وفاهم تلقه  تفكيره زي العيل

 واللي اظنه موسى يطلعلك فرعون

 

 

 

 

 

 اللي تقول عليه لا هذا باين  ولا باينة بنت ناس تلقاه ولد ولا بنت حرام (ربي يبعدهم على محبي شواطئ)  ويسلطهم على  كل الأنواع اللي فاتت

 

 

مرة لول قتلي غيودة معدش تعطي ثقة في حد لازم تديري نقطة سودا في كل شخص حتى يثبت العكس!!

يعني شنو حياتنا كلها نمشوها شك في شك؟

لقيت كلامها حق ومزبوط

 شك باش تجي إنت والحق سوا؟

 

 

 

علاش من تقول  للأعور أعو ر في عينه يكرهك( يعني تقول كلمة الحق في وجه مولاها)

شنو في رايكم سبب اللي صاير في مجتمعنا؟

 مستوى المعيشة المتفاوت وكره الناس لبعضها؟

ولا الأنفس تغيرت  لأسباب ثانية؟

أو المجتمع الليبي تخلط  بأجناس ثانية فتعلموا الموندو(الشعب بالطلياني) اللي هنا من البشر اللي  جايين من غادي كيتها (عجبتني الكلمة مفردة من الريف الليبي)

ولا قلة خوف   وخشية من الله؟

 

 

 

 

أخيرا خويرة تسلم عليكم  وقتلكم راسي داخ بالله عليكم  قولولي شنو اللي صاير؟؟؟

بالك حد منكم يعرف الإجابة؟؟؟

أضف الى مفضلتك

• 
• 
• 
• 
• 
• 
• 
• 
• 
• 
• 

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج  

1. absi قال:
   يونيو 4th, 2009 at 4 يونيو 2009 2:16 ص

   وهو وجهه (زي شبشب التليك)<<<<<قويه ههههههه
   شلابودي what is thatنبي نعرفها ههههههههههههه

   هههههههههههههه بصرحا ضحكتيني
   بنقولك حاجه في نهايه ناس مش زي بعضها
   و صدقيني ليبيا مزالت بخير

   ممكن تسلفيني 1000$نردهم في 3 ايام بس هههههههههههه
   امنوره اختي غيداء

2. وريده قال:
   يونيو 4th, 2009 at 4 يونيو 2009 7:15 ص

   موضوع جميل .. وعندك الحق في كل كلمة .. والصراحة التعامل اصبح صعب بين الناس الثقة انعدمت والكذب اكثر .. الخطأ وين بالضبط .. هذا ماكانش فيه عند الليبين كانت كلمته زي السيف .. ياحسرة .. تحياتي العطرة لك .. خالتك وريده

3. متليع قال:
   يونيو 4th, 2009 at 4 يونيو 2009 7:49 ص

   ههههههههههههه يا والله حالة انتِ تحسابي انتِ اللي طحتي في الأشكال هادي بس
   الشعب 3 أرباعه نصاب ههههههههههه
   تضحكي له يخنب سنونك
   تسلفيه يضحك عليك مع انه يوم تسلف موريك وجه الملائكة !!!
   و تقعدي تجري في جرته زي الك …حاشاك و حاشى السامعين
   المهم الحكمة اللي انا استنتجتها من التعامل مع العامة كالتالي :-
   تلقي حد يستعيث بيك يعني يطلب في النجدة على قول العرب الأولين
   عرفتي شن تديري ؟؟
   لو تلقي على راسه بلكة و يستنجد بيك
   حطي على راسه بلكة ثانية و فوتيه
   لأنك لو قمتيها من على راسه راهو حيضربك بيها

   هههههههههه
   و السلام

4. o_aldoini قال:
   يونيو 4th, 2009 at 4 يونيو 2009 12:30 م

   عندك الحق فى الكلم امتعك ظاهرة غريبة علينا وكل الناس ما تبيش تفتح موضيعها للتحيقي ولو ا زلبحك حد يوقول عليك انت الى مضحكة

5. Benghazi Citizen قال:
   يونيو 4th, 2009 at 4 يونيو 2009 1:23 م

   مرحبا صديقتي العزيزة…..اعتذر عن غيابي الطويل…سعيد جدا لانني هنا من جديد,و كالعادة,استمتعت بطريقتك المميزة في عرض مشكلة حقيقية كلنا واجهناها…
   ذكرتيني بكلمة( نحسابوك طيب)…طبعا هو/هي يحاولوا المستحيل يستغلوك , و يضحكو عليك ,و يمشوا عليك حاجات واجد,و لما تواجهيهم ,و توقفيهم تحسابيهم يتحشمو؟ لا و حاشا لله… يبحت فيك من فوق للوطة ,تقول الا قاتله واحد,و يقولك( باهي باهي,و ريتو الطيب ما يطلع منه)
   سبحان الله……..شنو تقوليلهم بس؟؟ مش هبال و الا لا؟؟؟ حسبي الله و نعم الوكيل
   ز حدث و لا حرج على خيانة الثقة و استغلال الامانة و عدم احترام وقت الاخرين(اللي هي بالمناسبة عقدة حياتي)
   تحياتي صديقتي العزيزة
   الى اللقاء ان شا الله

6. علاء بن فايد (علاء بن فايد (طرابلس مدينة الأحبة ومنبع ذكرياتى) قال:
   يونيو 4th, 2009 at 4 يونيو 2009 8:39 م

   موضوع مهم غيداء والله صدقتى فى كل كلمة قلتيها ربى يحفظك ويبعد عن الشر وسلامى للوالدة..ابوياسين وسلمى

7. مجهول قال:
   يونيو 4th, 2009 at 4 يونيو 2009 10:11 م

   غيداء
   من تسلم باسورد موقعك لشخص باش يساعدك وتعطي فيه الثقة وتلقاه لاعب في الموقع شلابودي( شلابودي كلمة طرابلسية قديمة منعرفش معنها بس ديما نسمع فيها من يلقى واحد حاجة ملخبطة هئ)

   ضحكتينى على الاخر… هذا شنو معاش قادرة نسكت من الضحك ؟؟!!

   انت جبتيها من الاخير وكلامك صح وحتى انى مجربة وهلبة مرات لهذا قررت انى نحط حد وندير روحى حولة…

   وانت تعرفينى لما اندير حولة كيف نولى!!

   هههه

   قولى لخويرة زيدى اقهريهم يا خويرة زيدى

   مريم الى بالى بالك

8. خالد الغول قال:
   يونيو 4th, 2009 at 4 يونيو 2009 10:20 م

   السلام عليكم غيداء

   تعرفي والله وقتي ماهو وقت ضحك، لأني في المستشفى في لندن قاعد مع خوي اللي جاي من ليبيا ولعبوا فيه الإنجليز… المهم قعدت نقرأ علي خوي في شنو انت كاتبه واحني مفلوقين من الضحك.. وقالوا شر البلية مايضحك

   وربي يضحكك دنيا واخرة.. وسلمينا على الجميع ممن نعرف عبر التدوين

   وعندي حكايات كثيرة اتوجع ومش وقتها… ادعيلنا

9. صحـــــــــــــــــــــــافة قال:
   يونيو 5th, 2009 at 5 يونيو 2009 2:01 ص

   الحقيقة ياغيداء ان كل ما قلته صحيح للاسف..المجتمع الليبي دخلت عليه عادات وثقافات غريبة..امتزجت به واصبحت جزء منه.. لايمكن ان تفرق بين الليبي الان وبين اي مُدعي التليب او حتى العروبة..واحكي لك انا الرجل ..ذات مرة اوقفني احدهم في بنغازي في شهر رمضان وكان معي طفلاي وقال لي: انت امس دعستني بالسيارة وهربت..ولانه شاف سيارتي نظيفة حسب اني من المرفهين اصحاب رؤوس الاموال فقال في نفسه هذه صيدة ثمينة..لكني مسكته من عنقه وقلت له : قل انا نصاب ونشحت..وفزع الطفلان فاستعجلته : قل؟؟ ..في الاول رفض.؟.وبعدين قال : انا نصاب ونشحت..ويعلم ربي ماذا اعطيته ..لكني لم اذعن له ابدا..حالتنا صعيبة يا غيداء..وتحكيلي وتشكيلي..نبكيلك ونواسيك..لك التحية.

10. مجهول قال:
    يونيو 5th, 2009 at 5 يونيو 2009 7:58 ص

    بالله عليك قوليلي هو انت صايرلك كل هدا اللي حكيتي عليه؟؟؟؟؟ بصراحه خلعتيني و خوفتيني يعني صح فيه المستغلين و الانانين و الخ الخ الخ و انا من الناس اللي تعرضت للموقف الاول متع كتم الاسرار و هالشي فعلا اثر فيا و خلاني مش بالساهل نوثق في حد و نتعامل بحدر بس غير هكي الحق لا
    ممكن لان مبدأالتسليف مسكراته
    اه فكرتيني هدا الاسبوع اللي فات كنت في الخدمه جوني الممرضات قالولي نبو نطلعو نجيبو فطور من برا بالك تبي تشتركي معانا
    مع العلم اني من الناس اللي ما يفطرش و هما عارفين فحسيت ان هما ناقصهم فلوس و كان هدا راهو ما جونيش المهم قلت باهي
    وقتها ماكانش عندي صراف و الله غالب فلوسي الماكينه تعطيني فيهم عشرينات عطيتهم العشرين مشو جابو الفطور و نسوني يعني من الاخير بكل براده لا ردو فلوسي و لا فطروني معاهم لين و حده حاجه كبيره قالتلهم من وين حصلتو باقي الفلوس باش تشرو كل هدا مش كان ناقصكم؟ قالولها حييييييييه على اساس كانو ناسيين
    المهم تاني يوم نسمع في وحده تلقح في الدوه يحسابوني انا اللي كلمت الحاجه مشي على اساس جايين بيردو الفلوس و يعتدور قالولي جيناك بنادوك تفطري لقيناك مشغوله
    قتلهم انا الفلوس ماندورش فيهم و اعتبروني عزمتكم على الفطور
    يعني معاك حق في الكلام اللي تقولي فيه هي الحكايه مش في الفلوس الحكايه في براده الدم و عيني عينك ياخدو منك ومرات تطلعي انتي اللي غالطه في الاخير
    قولي غيود العصا هادي فيه منها هنا في ليبيا؟؟؟؟؟؟؟
    هههههههههههههههه خوفتيني بنمشي ناخد وحده
    هيا صباحك سككككككككككر
    و سلمي على خويره
    ميمي

11. غيداء التواتي قال:
    يونيو 5th, 2009 at 5 يونيو 2009 12:47 م

    عبسي ههههههههه هذا الشبشب زمان قالت أمي بدينار ونص توة ساومته في محلات المقتنيات الأثرية بنشري منه لقيته ب 80 دينار من قدام كله فضة وقدمه فضة في طرابلس اي حد وجهه صحيح يقولوله وجهك زي شبشب التليك ههههههه

    أما(شلابودي) كلمة طرابلسية قحة وتعني تلعب في الحاجة تخليها ملخبطة وعلى وزنها كلمة تفركسها ههههه جاية من التفركيس (فركسيه) هههههه أكلة توة نقولك عليها مرة ثانية

    صح مش كلهم زي بعضهم بس صدقني النوعيات هادي بدت من 90% من الشعب الليبي

    شنو حسك قلت آه شنو مسمعتش تبي ألف درهم هئ هئ هئ

    دينار يعني هئ

    لالا مش قتلك شعووووووووووووووووووووووفة

12. غيداء التواتي قال:
    يونيو 5th, 2009 at 5 يونيو 2009 12:52 م

    خالتي وريدة مرحبتين وأهلين نورتي شواطئ ياخويلتي

    تي وينها الكملة زي السيف وينها توة معدش فيه إلا الكلام اللي زي المستكة وزي مقتلك راهو في أسباب أنا نجملها في اللآتي

    أولا الوضع الأقتصادي للفرد دون المستوى العالمي
    ثانيا الليبين زمان مكنوش شادين في الدين زي توة توة المتحجبات أكثر واللي يصلوا أكثر بس النفاق أكثر وأكثر وهذا ناتج عن شيوخ العازة اللي بدي كل واحد مداير لحية يقولوه ياشيخ قالبين الدين بالعكس

    وزيديها مفيش توعية دينية أبدا وتخليط الليبين بأجناس مش عارفة منين بدي اللي يجي يزوجوه وخلي يقولوا عليا عنصرية

    وعاودي الزيارة ياخويلة وريدة وربي يحفظك

13. غيداء التواتي قال:
    يونيو 5th, 2009 at 5 يونيو 2009 1:03 م

    متليع ميحس النار إلا اللي عافس فيها وانت الباين كنت عافس وعافس بكل هئ

    ايوة وهي تلقاه مشنوق زيد تل بيه الحبل والله العظيم بدو مسمينا شعب الله الحساد وشعب الله النصاب بدينا زي الشعب اللي بالي بالك نصب واحتيال تصدق مرات نقول هادو ليبين لكن نرد ونقول والله والله اللي أصله طيب وليبي مش مجنس ميدير العار هذا لأنه عارف روحه اسم عيلته فوق أي اعتبار

    ههههههههه حلوة النصايح رد بالك تغيب على شواطئ

    يلا سلام

14. غيداء التواتي قال:
    يونيو 5th, 2009 at 5 يونيو 2009 1:08 م

    o_aldoini

    عمر وهذا المقصد هنا نصيحة لكل واحد ميخليش اي حد يضحك عليه ولو تبي تدير عمل لحد قوله فلوسك هما الأولات ولو جي حد قالك سلفني رد بالك من الصنعة هادي خود منه ورقة وشهود عليه والله ربي سبحانه وتعالى قاله في القرآن قال اكتتبو الدين وهذا اللي مفروض يصير

15. غيداء التواتي قال:
    يونيو 5th, 2009 at 5 يونيو 2009 4:34 م

    د.عاصم صديقي العزيز غيابك له أعذار وهذه الأعذار أعرفها ومقدرة جدا لكل ماتفعله

    عاصم صديقي

    ايوة هادي هي من تواجههم وتفهمهم إنك فاهم يبدو يشوفولك من فوق للوطا ويقولوك شنو هالوعارة شنو هاد الناس تصكت وتفوت اهيا الكلمة اللي كاصرتلي رقبتي متع فوتي اصكتي شنوووووووووووووو نفووووووووت
    والله مصارت اي حاجة ماني مفوتتها باش نرضي فلان وعلان ونخلي روحي مضحكة باش هما يفرحوا هئ فكرتني بناس توة مسكتين يحسبوني عبيطة مش فاهمة شي وأنا تذاكرهم تحت باطي تقول أمي ههههههه

    وواحد حرض سين وحدة باش تلقح في مدونتها هئ هي بطريقة مش مباشرة بس فهمتها

    وكمشة مخربين القيت علشهم القبض متلبسين في حاجة هئ بس توة نقولها وقت اللزوم

    ويخي فيه واحد مدون مداير روحه مدونة يفوت فيه علينا واحنا كل يوم ضحك ونقولو غر شوفوه كيف يبي يفوت مراكبه علينا هههههههههه ونا زابطينه يحسنا مضحكة ولا اغبياء ولا مش عارف شنو

    المهم راهو حتى في عالم التدوين كاثرين الأشكال هادي بس عارفتك فاطن للموضوع زين

    ايييييييييي خيانة الأمانة فكرتني بواحد حتى هو ماشي وفمه يمشي يحساب روحه فتح مكة وهو طلع روحه عيل من يقول درت ودرت ودرت

    أما وقت الآخرين ياعاصم هذا نقولك بدي حاجة عادية مبيتش نجبده تقعد مديرله موعد ومتشحط وتلقاه مدمدر ( يعني راقد دمدار يعني قبر) هئ في حوشه وانت تسنتى بالساعات

    سعيدة غنك أول مخشيت للنت مريت على مدونتي

    عزيزي سلامي للجميع هناك

16. غيداء التواتي قال:
    يونيو 5th, 2009 at 5 يونيو 2009 4:36 م

    ابو ياسين علاء بن فايد أنت أكثر واحد مريت بالأشكال هادي وياما حكيت قصص عليهم ياريتك حكيتنا قصة ناخدوها عبرة

    سلامي للصغار وأمهم

17. غيداء التواتي قال:
    يونيو 5th, 2009 at 5 يونيو 2009 4:38 م

    مريم هئ هو اي طريق بيودي على فين عارفتك تدير يفي روحك حولة وهما يحسابو فوتو عليك المقلب لكن انتي زابطة كل شي بس في رأيي لازم من المواجهة ولازم تفهميهم إنك فاهمة

    هئ الموقع ايييييييييي تتفكري !!

    المهم خويرة تسلم عليك وقتلك والله لاا نزيد نقهرهم هههههه

    سلام

18. غيداء التواتي قال:
    يونيو 5th, 2009 at 5 يونيو 2009 4:41 م

    خالد وووووووووووووووووووينك

    حي حي قلت شوره طبوك من غادي ههههههههه

    ألف لاباس على خوك إن شاء الله ميشوف شر ونهارهم اسود الأنجليز لو مردوشي زي ماكان القوات كلها تجيهم غادي ههههههه

    الحمد لله اني خليته يضحك على الأقل ينسى شوية

    اما الحكايات أن متأكدة إنه عندك شبردق( شبردق معنها هلبة حاجات) الكلمة قوية بكل ههههههههه

    نستنى في حكاياتك

    والكل يقولي مالا وين الغول وين الغول

    راهم يسألو عليك الحق

    ربي يشفيه يارب وبلغه سلامي ودعائي ليه بالشفاء

19. غيداء التواتي قال:
    يونيو 5th, 2009 at 5 يونيو 2009 4:49 م

    استاذ محمد اييييييييييييييييييه هادي عينة بس تعرف مش عارفة منين بدو يجو اساليب النصب نهارهم أسود مش شفت تقرير المهير على الجنسية ولالا المفروض يجردو الجنسية والله صحة ليك لو حد ثاني راهو خاف وانا قلت الكلام هذا نقدرو نقضوا على الظواهر هادي بأننا منسهموش في زيادتها برفضنا ليها

    شكرا لمرورك على شواطئ

20. غيداء التواتي قال:
    يونيو 5th, 2009 at 5 يونيو 2009 5:05 م

    ميمي ميميميميميميييييييي

    أخيرا فتحت شواطئ اليوم جمعة حركة السير مهفتة هئ

    شنو منو هو شنو فيه شنو حسك قلتي يعطيهم سمسام بطونهم خالعتهم حي حي حي حي شنو تخدمي عليهم انتي ملا شدي عندك حيدورهالك مرة و2 و5 وقولي قالت غيود صدقيني ياميمي فيه ناس متتحشمش وحتعاود صنعتها ولو منك قولليهم فطور بعشرين دينار مالا مش جابوه بطيارة خاصة يعطيهم سم إن شاء الله في بطونهم حي عليهم وكلوا من غير مييجبولك فطورك صدقني مالا اهو نقولهالك انهم ثقي وتأكدي طاحو فيك قرمة أول مالحاجة دوت معاهم يعني ههههههه صارلي موقف المهم مقعمزة ندير في عمل أنا و3 زميلات وواحد معفن حاشاك ممخلي مداير من كل الكلوف وقدامي يضحك ووراي بيموت كيف أنا تجيني الخدمة هادي كلها وقدامي في راس الطاولة 3
    وحدة منهم صويحبتي و2 عارفتهم قبل طايحين فيا بيموتو علاش أنا نلبس ونظيفة يبوني نجي زيهم منسرفين المهم بعتت بونتو فيهم جبت فطور مش اللي جنبي قتلي حي عيب اعطي لاسمعيل فطور قتلها شنووووووووو حلوة هادي ياكلو لحمي ونوكلهم رزقي منبيش نعطيه هههههههههههههههههههههههههههههههههههههههههههههههههههههههههههههههه

    تعرفي مريم بالي بالك كانت مقابلتني بعتلها الفطور تقولي لاسير متحرك متع سوق الثلاث وهما عيونهم يتبعو ف الفطور مش شافتلي وميتة بالضحك قتلي صحة ليك والله من طلعنا

    قتلها هاذ طبعي الصراحة وكلمتي في الوجه وعلاش نبي ننافقهم باللعكس من قلت هكي زبطني عرفته شنو مبقبق وناق عليا وعلى الخدمة ناض تسلحب زي الحش ومعدش شوفته قريب جاته جلطة أما الأثنين اللي منطمرات في راس الطاولة كارهيني لأني مطربقة عليهم في الشغل
    وزابطتهم ميدروش فيه باهي ومواجهتهم وقتلهم انتو متخدموش كويس وراكم تهربوا وتغيبوا ههههههههه

    تعرفي وجهوهم ولوا زي الكتانة السودا ههههههههه

    تخليهم هكي يديرو ياميمي عيب عليك ناديتني راني وريتهم هههههههههههه

    اسمعي توة مريم بالي بالك تقرا وميتة بالضحك على الموقف هاد

    حلوة نعطيهم ياكلو من رزقي وهما طايحين فيا وفاتيني على خاطر بطونهم اعطيهم تهرية فيها وخلاص

    المهم العصا هادي اي موجودة بس صاحب خوي يجيب فيها من الصين وقالي خوي يبيع فيها إلا للناس اللي عارفهم مستحقنيها تدير شرارة ولالا حي حي تبطح أكبر شحط لوطا تشله حركته ممكن 5 دقايق بس أنا نبي نعطيه ضربتين باش نحصل 10 دقايق بونيات في وجهه علامة فارقة باش معدش يتعدا على بنات الناس ههه (نبصر مش تحسبي حق بنضربه اكيدة نبهرب نجري بسيارتي ههههه)

    لو تبي منها حاضر ياميمي بس نصيحة من يجو يبو فلوس قوليلهم حاضر واعطيهم صكة بيها هههههههههه

    وشوفي ميمي معدش تخليهم يعاودوها معاك

    بالله عليك توة الأجانب مش كل واحد يفطر يخلص على روحه شنو تشوفي فيهم يزعلوا من بعض؟
    بالعكس هادي ظاهرة حضارية جدا ولو اني اناوصحباتي المقربات ميجيش بينا تعرفي ليش لأنهم زي مريم زي صاحبة مريم زي بشورة ماشاء الله اصحاب واجب وكرم وكل مرة تجي في وحدة يخي نتعاركو منو بيخلص لين مرات اللي بنخلصوه يبدا يقول سقدوني تعاركو برا هههههههه

    يلا سلام عزيزتي

21. مجهول قال:
    يونيو 5th, 2009 at 5 يونيو 2009 6:55 م

    تحكيلي نبكيلك
    كنت طول عمري حريصة لعند طحت في مكتب عقارات في بنغازي- صاحبه مهندس مأفن ” يعني معفن - نصاب بدعة - لطش مني ومن مجموعة اخرى فلوس بالهبل رغم في عقود وخرائط ومخططات مدنية ووصولات
    ولكن اصقع من وجهه ماريت لعند اليوم وانا هنا يتهرب من اهليوخوتي ومن الناس الاخرين اللي دايرهم طوابير وراه وعنده الف نقال عاطي لكل زبون رقم مختلف عن الاخر ومايجيش للمكتب نين السكرتيرة تقوله الشارع امان والمكتب غير محاصر
    ليومنا هضا ما حد خذا منه حق ولا باطل
    رغم اني من البداية حسيت بنفور منه وشكيت للي جو معايا يشروا قاللولي انتي ديما حابكتيها تهايالك
    وحق الله ما كان يتهايلي طول عمري حدسي لا يخطئ واحساسي بالشخص اللي قدامي فوري وما يخرش امية - بس الله يسامحهم دهبلوني وراهم
    اخ لو نحط يدي في زمارة رقبته المأفن
    حتى هلي نسوا اسمه يكلموني ويقولولي المهندس المافن دار ودار وصار معاه وطرا وجراومش قادرين نحصوله ووو
    غيود تجي معايا بعد نحدر نفصعوله رقبته ونطلعوا فليساتي عرق جبيني منه بلعومته
    اسمعي راهو داير روحه حاجة كبيرة وماسك موقع في امانة الزراعة ومنه ينصب عالعميان اللي يقودوا في الطرش في الزفة زيي
    تعرفي مازلت صابرة نين نجيب اجله بالمستندات كان ماردلي حقي وحق الاخرين اللي معايا في اقرب وقت
    مله عالم فالت خالط جالط معيز وضان ومزقليف
    ل ن

22. مغتربة قال:
    يونيو 5th, 2009 at 5 يونيو 2009 8:30 م

    سلامات غيداء ان شاء الله تكوني بخير وبصحة,,
    هذه ياغيداء يقولولها قلة احترام وسؤ تربية وهي صفة موجودة حتى في البلدان المتحضرة بس بطريقة مختلفة
    انى مع الانجليز على قول الاستاذ خالد صارتلي مواقف زي هادي كنت نجيب في قرطاسية اقلام وكل شي وخلال شهر كل الاقلام تتسرب من قدامي تعرفي لما نستحق نكتب معادش نلقى والى يومنا هادي وفوتتها لين جيت يوم نبي التى الحاسبة وعادة ادواتي في الركن المخصص ليا ولا لقيتها ومحتاجة انى نستخدمها لعملية حسابية معقدة تخيلي شهرين في بحث مستمر لين نلقاها عند وحدة من الزميلات الانجليزيات وكانت تستخدم فيها بدون حتى استئذان والالة فيها غطاء لقيته حاطة فيه كوب !!!!
    خلاصة القول صحيح انها اشياء بسيطة لكن لما يتكرر الموقف اكثر من مرة فيعطيك شعور غير مريح .
    اما حكاية الاقلام الى يومنا هذا كل شهر اشترى مايزيد عن 10 اقلام حبر جاف واقلام رصاص وونهاية الشهر تتبخر كلها.

    مغتربة

23. غيداء التواتي قال:
    يونيو 5th, 2009 at 5 يونيو 2009 9:02 م

    هالمأفن هاد ريتي ولالا مش عارفة كيف سكتوله معقولة مفيش واحد منكم طلع افيلح ودراله طربيقة شده والله لو أنا ماهو فالت مني لين نحيهم منه وفوقهم يخي شهدرة في الشارع الل يفيه حوشه ومكتبه وخدمته باش يكون عبرة لغيره

    تعرفي لو تحدري هانا ونعدي معاك غادي كيتها نخططلك في خلقة طربيقة تشد أكبر فار في العالم نخليه يقعد أمثولة قدام النصابين اللي زيه مادمه خاربة خاربة والبلاد ماشية بالبركة بلا قانون تعرفي لو منكم شنو تديروله خطة جهنمية توة نراسلك نقولهالك هههههههه صدقني لو تطبقوها مزبوط حتطلعو كلكم بحقكم وفوقها تنصبوا عليه ههههههههههه وتاخدوهن الفلوس الزايدات تصدقوهن ههههههههههه

    بس شنو رايك لو تبعتيلي الورق ونسخ منه واسمه بالكامل نديرله فضيحة بجلاجل على المواقع أصلا أن ندور في المخانب والمرتشين والنصابين واللي ياكلو في رزق الشعب باش نفضحهم والله العظيم نكتبله متابعة نخليه ماعاد يقدر يوري وجهه في اي مكاننستنا في رايك

    ههههههههههه

    معيز وضان وبزقليف ههههههههههههه صدقتي فيها ياصويحبتي ومعلش عاذراتك شوفي ميمي النصابات شنو دارو فيها

    لكن زيدي فكري لو تبي ابعتي الورق وتحكيلي القصة ونفضحهولك على العلن لين يقول

    بعععععععععععععععع

    ههههههههههههه

    تايرتنا كلنا في الهوا سوا الكل متعرض للنصب

    يلا سلام

24. s.s.ali قال:
    يونيو 5th, 2009 at 5 يونيو 2009 9:59 م

    السلام عليكم

    ههههههههههههههه و الله ما عندي ما نقول زعمة نضحك و الا نزعل بس الكلام واقع عايشينه كل يوم …

    بس تعرفي اسوء شى انك تعطي تقة في شخص و تسلمه اسرارك و بعد عشرة و معرفة طويلة و في ابسط خلاف و ياخي مرات بلا حتى خلاف تلقاه مسرب اسرارك و طاعنك في الظهر..

    اما قصة الفلوس و السلف فهذا بدت طبع في اغلب الناس و يوم تكلمه على فلوسك يزعلك منك و يقولك شن اني بنهرب..

    ربي يهدي العباد و صحيتي هلبا على البوست

    سلام …

25. ناجي الزوي قال:
    يونيو 6th, 2009 at 6 يونيو 2009 4:22 م

    اولا السلام عليكم مساك الله بالخير يا اختي غيداء موضوعك و شجون كثيره 
    
    
    
    وبارك الله فيك ام موضوع النصب فساروي لكم قصة رواها لي ابن خالتي بالبارحة وحينما اكمل كتابتها سوف اعلمكم بها موفقين جدا

26. osama قال:
    يونيو 7th, 2009 at 7 يونيو 2009 10:54 ص

    سلام

    غيووووووودد هو انتى لسة فكرة ههههههههههه

    تقة اى تقة باللة التقة فى الرسول علية السلام و الرسول مات خلاص معاش فى تقة ههههههههه

    اسمعى غييووووود الوقت تغير معاش زى قبل توا المادة والطمع عامى قلوب الناس

    المهم ايديرووو فلوس بى اى طريقة كانت حرام او حلال

    ماشين بى الغاية تبرر الوسيلة

    ربى يحسن الخاتمة

    باى خيك اسامة

27. مصطفى الساحلى قال:
    يونيو 7th, 2009 at 7 يونيو 2009 8:56 م

    المجتمع الليبى يعيش حالة من الازدواجية ناجمة عن الاختلاف الثقافى بين ماهو قديم وماهو جديد بمعن انه لم تتم عملية صهر لده الثقافات فى بوثقة واحدة مثلما حدث فى الدول الاخرى المتقدمة على سبيل المثال فى امريكا حيث تم صهر الثقافات القدمة الى امريكا من العديد من الدول فى ثقافة واحدة وهى الثقافة الانجلوسكسونية والتى تعتبر من افضل الثقافات وللتدليل على اهمية صهر الثقافات نجد ان هده المحتمعات التى قامت بعمليات الصهر هى من اكثر الدول من حيث ارتفاع نسبة عامل الثقة والتى وصلت معدلاتها الى مايتراوح الى 70% فى الدول الاسكندنافية وفى باقى الدول الاخرى المتقدمة تتراوح مابين 70% الى حوالى 60% اما فى الدول المتخلفة والتى تعرف بالنامية ففى الجزائر مثلا تصل معدلات عامل الثقة الى 15% اما فى ليبيا فهى تصل الى درجات اقل من دلك بكثير وباعتبارى اعيش فى هدا البلد واهل مكة ادرى بشعابها كما يقول المثل وهدا يعو الى نظام هلامى سديمى لا منظومة تحكمه سياسيا واجتماعيا وثقافيا المر الدى ادى الى هدا النقص المفجع فى هدا العامل واضيف من اهم العوامل التى تعمل على تناقص هدا العامل وانخفاضه هو انعدام وجود منظومة قيمية برتضيها المجتمع ويقوم على اساسها وهده هى القاعدة الدهبية التى تقوم عليها المجتمعات وتزدهر وتتقدم

28. خالد الغول قال:
    يونيو 8th, 2009 at 8 يونيو 2009 9:04 ص

    السلام عليكم

    غيداء

    بالله عليك ياريتك تعرفي شنو صاير حتى في الليبيين اللي برا…. فيه ليبيين يخدموا في المستشفى وماجوش يسألوا علي خوي ولا ترى اي رحمة مرجوة كل اللي ايديروا فيه بزنس وايجيبوا في الليبيين والعرب لهذا المستشفى… وفيه الليبيين اللي اني زرته لأنه يشتغل 20 ميتروا من المستشفى وتعرفت عليهم وايقول توا انجي انزوره ( واني في داخلي والله ماك جايه غير بيع كلام) أقسم بالله لاتوا واني اسبوعين غادي وماجي زاره ..وفيه اللي يعرف الفيلم اللي امدايرنه لخوي اللي لولا ماجيت راوه دفنوه وهو حي…..
    واللي نحكي عليهم راهو ناس كيار في اللي يبي ايغير النظام ويقيم دولة العدل وفيه اللي يتحدث عن الإصلاح وغيره من التفنقي وخلي الطبق مستور.

    اضطريت لسفرة لدبي لمدة 3 ايام اطلعت يوم السيت في المساء لأن انسيبي سيأتي يوم الأحد بدلي لأني بعد دبي سأرجع لكندا اسبوع ثم ارجع… لما وصلت لدبي اتصلت باخي قاللي طحت علي طول طولي في الأرض والممرضة زعميتك رافعاته وهما عارفين انه هلكوه مايقدرش يمسك توازنه… غبت عليه ساعات انفلق… خلي نرجعوا للموضوع.. بالله اتصوري انه خوي سافر بروحه باش ايدير عملية شنو ايصير فيه… دوة هلبه عندي .. ربي يلطف وخلاص…..

    لكا كنت غادي بفضل الله كنت مأدب امهم… حتى الطبيب اللي امداير الفالطة يبي ايسافر اسبوعين نخللي رسالة مع الممرضة بعلمني انه مسافر اسبوعين وبيرجع وراهو ماهوش هارب…

    هذا شوية مي اللي صاير في الليبيين برا.. واللي ايتكلموا عالوطن أكتشفت ان اغلبهم لايملكون مقومات اصلاحه ولافي شخصياتهم مواصافاته…. وتو اتجي الدوة واللي ايقول اني كذاب ايكذبني

    مع السلامة غيداء والجميع
    وارجو الدعاء

29. radio moon قال:
    يونيو 8th, 2009 at 8 يونيو 2009 11:09 ص

    Thank you verey much for the beneficial informatin .

    thanks.. good look

    radiomoon vb

30. مجهول قال:
    يونيو 9th, 2009 at 9 يونيو 2009 5:24 ص

    خير — يا —- غيداء–
    شنو اللي صاير في ليبيا؟ .— صار اللي صار يا لللي .صار اللي صار يا بابا .صار اللي صار ياحنه . صار اللي صار . هذه أغنية ليبية قديمة من ايام . ألكاراطون . سلام ياغيداء . مانبيش أنطول عليك .عندي .البرمه علنار شايطت .هاية .تتتففضلوا كككلكم .

31. غيداء التواتي قال:
    يونيو 9th, 2009 at 9 يونيو 2009 11:44 ص

    اس اس …

    مكانوش الليبين هكي قبل مش عارفة العولمة تخش لمكان هكي تدير فيه ولا التطور ولا معدش فيه خوف من ربي ولا ولا ولا

    بالحق توة تعرف من نقول لقب واحد طول نعرفه من اي منطقة وبلاد ويخي مرات تعثر في أقاربه

    توة كل واحد يجي يقولك انا ليبي

    الدنيا تخلطت أشكال وألوان إلا مت فتحت باب السيارة تقول في ولاية من ولايات امريكا وفي حرب عصابات هاد مكان ناقصنا بس الحق

    باهي صفي النية وقولي زعما قداش مرة شوفت نماذج زي هادي؟؟

32. غيداء التواتي قال:
    يونيو 9th, 2009 at 9 يونيو 2009 11:48 ص

    ناجي الزوي نستنو في القصة على الأقل ياخدو منها القراء عبرة

    ونشاطك واضح في مدونتك ماشاء الله

33. غيداء التواتي قال:
    يونيو 9th, 2009 at 9 يونيو 2009 11:49 ص

    اسامة انت جيت باهي منوووووووووور شواطئ غر لو نعرف وين غابر بس

    زعمك متكونش تعرضت لنصبة ؟؟

    صفي النية وهدرز قولنا على اي حاجة صارتلك ونصيحة خوذ احتياطاتك زين

34. غيداء التواتي قال:
    يونيو 9th, 2009 at 9 يونيو 2009 11:52 ص

    مصطفى احنا نبو ثقافة شيكسونية( هئ الحروف الأولى جاية من كلمة شيطان والعياذ بالله)
     
    ولا انصهار ولا شي غر كان يبطلو المظاهر متع كل واحد ميدريلي روحه شيخ وماشي للعمرة ويبطلو كلوف ويصفوا النية بس لكن هذا وين ؟ معدش فيه خلاص بحححححححححح

35. غيداء التواتي قال:
    يونيو 9th, 2009 at 9 يونيو 2009 12:21 م

    خالد الغول شوف اي حد مقعمز  غادي  ويقولك نبي نغير وندير دولة العدل ونديير وندير راهو كذااااااااااااب الشعب المسكين هدا فوطة
    
    مديرينها اللي يبي يوصل للسلطة يتكمل باسمه وأنا متأكدة انهم لو وصلوها لاما يخربوا فيها أكثر وأكثر ومنقولو يامبهاك ياراجل أمي الأول
    
    والإصلاحي وال ووو هادو كلهم  بدون استثناء برا وداخل نشوفلهم أنا تيارات فاسدة شنو شعارهم حب الوطن؟ خدمة الشعب باهي ياسيدي تعالا هي تقدر تحب بلادك وتخدمها ساعد في تكوين مجتمع مدني وهكي تقدر تحرك المجتمع المدني زي ميبي الشعب مش زيييي ميبي فرد ويكون قوة فاعلة في المجتمع ساهم في حماية البيئة كون جمعيات خيرية حث الناس على المشاركة في أعمال تهم بلادهم
    
    تحرك من الشبكة افتح مدونات خلي الناس تكتب شنو اللي مش عاجبها هادو بيقعدو يتناقرو ليوم الدنيا والدين وبححح مفي شي
    نرجعوا لخوك أدبهم واعطيهم على راسهم وفوق هدا كان من زيك نشكي كل واحد مقعمز غادي يكوش ويقولك الغرب الغرب بالله عليك غرب شنو ؟
    اللي حفظلي كلمتني انجليزي كاك كيك كاك كيك جاي يدافع على برا وبرا ونسي إنه ليبي وليبي يعني افهمها
    فضحايهم أونه في مدونات ليبين قاعدين غادي الحمد لله هلبة مدونين برا وينقلوا في الصورة
     
    وأنا مشيت وسافرت وعشت في سين من البلاد مدة وشوفت ويقولك ليبيا متفنعش وليبيا وليبيا
    اهو خوك قريب ارتزيه في عمره وشوف الممرضة شنو دارت؟ والدكتور وين بيهرب ياعيني ياعيني والله لو كنت قريب كنت جيت عاونتك قطرته التون في عيونه حالو وخلاص قالك علاج برا شنو برا والداخل خيرهم الأطباء الليبين كخة
    مينفعوش والله تشخيص لهلبة ناس نفسه غر فندقة بدت عندنا قول لخوك يروح يدير عمليته اهنا لو عمليته ساهلة ماشاء الله أطباء زرعوا كلي وكبد ربي يحفظهم ليبين السبب في موت المرضى التعقيم الناس ماشية جاية برا للعلاج مش لأنه الأطباء مينفعوش بس
     
    الليبين يحبوا يمارو في كل شي تخطم من قدام حوش تلقة لونه بودري تجي بعد اسبوع تلقى الشارع كل دار زيه يمارو بشكل غريب حتى في البلادات زمان شدوها على تركيا سياحة(طقس بكل) ولادنا الأطباء نوراة الطب في العالم لو تخش مستشفى برا تلقى ليبين أطباء منورينه وحتى هنا الحل شنو ياوخيي ياغول لازم تدير تدوينة في مدونتك الجديدة
     
    شنو صار معاك خطوة خطوةواذكر اسماء فضح بيهم ومتقوليش مافيش وقت خود معاك الاب توب واكتب في الطيارة استغل الوقت ونستنى فيك وبعيد السوووووو على وخييك ربي يشفيه ويعافيه والليبين الي غادي تعلموا برودة القلب من الأنجليز عاد محسوبك عارف المثل اللي يقول حاشاك وحاشا السامعين (حط الحمار بحدا الحمار يعلمه الشهيق والنهيق) والإسلام برئ من ها لأشكال لأن ديننا دين رحمة وتواصل ومحبة وإخاء وتوة نرجعلك لأني دهشت صراحة
     
     
    نشوفك بخير ياغول

36. غيداء التواتي قال:
    يونيو 9th, 2009 at 9 يونيو 2009 12:30 م

    radio moon

    Welcome Beck

37. غيداء التواتي قال:
    يونيو 9th, 2009 at 9 يونيو 2009 12:31 م

    هههههههه اي اي الكارطون والكروسة ووووو ياما سمعت
    
     
     
    حكايات من أمي وحناي باهي صحتين البرمة بس يارتني عرفت منو انتي سلامات

38. ناجي الزوي قال:
    يونيو 10th, 2009 at 10 يونيو 2009 4:58 م

    الاخت غيداء القصة التي اخبرتكم عنها هها ارويها اليكم علي لسان ابنة خالتي فرحات علي الجبالي
    اخبرني ابن خالتي فرحات علي بانه في الايام القليلة الماضية حصلت معه قصة فيها دروس وعبر يروي لنا القصة وفي النهاية له رساله مفتوح الي كل مدراء واصحاب العيادات الخاصة .. يقول فرحات :

    ابني ( علي ) عمره 5 سنوات , واكتشفت بان لديه تشوها في العضو الذكري عند فتحة البول منذ ولادته بايام قليلة , حينما اردت ان اقوم بختانه , فأخبرني الطبيب ان فتحة البول ليست في موضعها الطبيعي ونصحنا بعدم اجراء عملية الختان الا بعد اجراء عملية تصليح لفتحة البول … وقد اخبرنا الاطباء بان افضل وقت لاجراء العملية هو حينما يصل عمر الطفل 5 سنوات .. وحينما فعلا وصل ابني هذا العمر قررت ان ان اسافر به الي تونس لاجراء هذه العلمية .. غير اني لما سمعت بوجود دكتور تونسي زائر ويدعي نبيل ابو زينة لاحدي العيادات بمدينة اجدابيا قررت ان اعرض ابني علي هذا الطبيب كان ذلك في 1 / 6 /2009 وحينما عرضت ابني علي الطبيب وبعد فحص سريع وبسيط جدا اخبرني بان ابني ( علي ) يحتاج الي عملية ثانية باسثناء عملية فتحة البول وهي عملية تنزيل الخصية اليمني لانها لم تكن في وضعها الطبيعي ؟؟ .. وهذا ما فاجاني به الطبيب لان كل الاطباء الذين راجعتهم لم يخبروني بان الخصية اليمني ليست في وضعها الطبيعي واخبرني الطبيب التونسي بانه بامكاني اجرائهما لابني في عيادة الهرم بنغازي بمبلغ وقدره 1800 دينار فقررت ان يجري هذا الطبيب الزائر ربني العمليتان وطلب مني اجراء بعض التحاليل الطبية واجريت هذه التحاليل واخذ هذه التحاليل الطبيب نفسه وقال لي بان موعد العملية غدا في العاشرة صباحا في عيادة الهرم .. في اليوم التالي وصلت العيادة فلم اجد الطبيب التونسي فقمت بالاتصال به فاخبرنا بانه في الطريق الي العيادة .. طلب مني اجراء دخول لابني للعيادة دخلت العيادة فاستقبلوني استقبال سيئ للغاية .. في البداية ارادو ان ياخذوا من ابني تحاليل طبية فاخبرتهم باني اجريت كامل التحاليل الخاصة بالعملية واناه عند الطبيب وهو الطريق اليكم … عارضوني في ذلك وطالبونا الكف الكلام وان التحاليل ضرورية اجراؤها عندنا ؟؟؟ .. فوافقت علي ذلك فجاءت ممرضة … واي ممرضة هي ؟؟؟ اخذت ابني لتاخذ منه عينة الدم انا ارقب ما يحصل فاذا بها تفشل في غرز الابرة في الوريد عدة مرات وابني يتالم ويصرخ من شدة الالم وبعد عناء كبير تمكنت في غرز الابرة في الوريد بعد غرزت الابرة في اعماق جسم ابني مما ادي الي نزيف دموي تحت الجلد ادي الي انتفاخ يده بشكل مريع … الامر الذي دعاني الي ان ُاوقف الممرضة عن اخذ العينة نظرا لحالته التي يرثي لها احتجت الممرضة ودخلت علي الطبيب المسؤل في العيادة فاخبرته فان الممرضة فشلت في اخذ العينة بالطريقة السليمة .. فاصر بان تاخذ الممرضة العينة لاجراء التحاليل فرضت ذلك … واخبرتهم اني قد الغيت اجراء العملية لابني .. فذهبت الي مستشفي الفاتح للاطفال ودخلت علي الدكتور : صالح القماطي فقام بالكشف عن ابني وقال بان الخصية اليمني لعلي في وضعها الطبيعي … وقال لي : حرام عليك تجري له عملية … الطبيب التونسي يكذب عليك . ولو انه قام باجراء العملية فانه سوف يجرح الطفل ويقوم بخياطته ليوهمك بانه قد اجري العملية .. وقام هذا الطبيب باستدعاء طبيب اخر ليقوم بفحص ابني ولياكد لي التشخيص فاخبرنا بنفس التشخيص وان الخصية في موضعها الطبيعي فقررت الذهاب به الي مستشفي الهواري وقام الدكتور محمد عثمان بالفحص عن ابني واخبرني بان الخصية في موضعها الطبيعي وانه يحتاج فقط الي عملية لفتحة البول وهي عملية تجري مجانا في المستشفي فقررت ان اجريها في هذا المستشفي وبعد يومين اتصل بي مدير مستشفي الهرم وتاسف عن سوء معاملة الممرضين لي واخبرني فانه سوف يحقق مع المرضة … فنصحته بهذه النصيحة التي اريد ان اوجهها الي كل مدراء العيادات والمستشفيات الخاصة بالا يستجلبوا اي طبيب دون معرفة السيرة الذاتية الحقيقية ويكفينا (دعايات التي تملا كل الارجاء ) .. وان المسالة ليست مادية وانما هي مسالة انسانية بحته قبل كل شئ

    للاطلاع علي المزيد بالصور ادخلي علي مدونة الكوز

    تحياتي وودي لــ غيداء

39. مجهول قال:
    يونيو 11th, 2009 at 11 يونيو 2009 1:44 م

    اهلا غيداء كيف حالك وحال السيارة الجديدة انشالله مباركه اعليك الناس كلها بدات حسد
    
    وغيره وبعدين يصبح كره بدون سبب وانشالله ربي يصلح الجميع كيف ربي يبي يلطف بعباده قبل ما ينظفوا ما في نفسهم ياريت كل من يحب يعيش في مكان نظيف قبل ماينظف المكان ينظف قلبه المهم اخبارك توصلني من امي ديما ننشد اعليك
    
    انشالله نتلقوا بعد شهر ونشوفك بخير

40. ابومالك المهاجر قال:
    يونيو 12th, 2009 at 12 يونيو 2009 9:59 م

    لا حول الله ولا قوة الا بالله
    هذا الوضع اصيح فى كلـــــ من سنة فى ليبي نصب على واحد فى مصر بمبلغ كبير
    معش فى ثقة فى حد اليوووم
    وبارك الله فيكى
    http://ghraib82.maktoobblog.com/

41. لقني ليبي قال:
    يونيو 14th, 2009 at 14 يونيو 2009 8:02 ص

    الأخت غيداء وزوار وشواطئ

    السلام عليكم هذه المرة من كندا

    لقد قرأت تعليق ميمي هنا وقصتها مع فعل الممرضات معها.. وأنا أريد أن اسأل: هل ممرضات بهذه النفسية يصلحن في معالجة مريض؟ هل بؤمن تسليم مريض لهن؟ وهل تنطبق عليهن مواصفات الممرض؟ هل وظيفة الممرض هي فقط تغيير الشراشيف والإسرة واعطاء الدواء؟
    الذي أخشاه أن أمثال هولاء الممرضات أنهن يعاملن المرسض ويدعين عليه بالموت؟

    ياترى من يذكر في صغره معاملة الممرضات النصرنيات ( السوريلات)؟ هل تذكرون حسن المعاملة منهن؟
    من لايعرف يسأل الكبار

    تحياتي للجميع
    وتدوينة قريبة على مدونة لقني ليبي فانتظروها

    خالد الغول

42. مجهول قال:
    يونيو 17th, 2009 at 17 يونيو 2009 1:53 م

    ههههههههههههههه

اكتب تعليــقك

زيدي اقهريهم ياخويرة زيدي

وريهم ياولد خويرة