شنو بنقول كل النصايح اللي في المقطع السابق صايرة على الطرق الكل يعرف ضحايا   الحوادث في ليبيا اللي صنفوهم في تقارب مع عدد من اللي ماتوا في غزة  وهادي هي الأحصائية منقولة من موقع شباب ليبيا اضغط هنا لتقرأ الكارثة أو الحرب الصامتة

قرانديزر في حرب الفضاء

ونقلت ليكم بعض الأحصائيات وهي كالتالي..
حيث سجل في العام 2007 م ما يقارب 7036 حادثة أدت إلى وفاة 2138 شخصاً، وإصابة 5950 إصابة بليغة ( معدل 6 أشخاص يموتون يومياً ) كما أسفرت الحوادث التي شهدتها البلاد بين عامي 2003 م و2007 م عن وفاة 9330 شخصاً وتضرر 77507 سيارة، وقدر حجم الأضرار بحوالي 81 مليون دولار.

شنو السبب أو الأسباب  أنا حنقوللكم  الأسباب

عدم احترام اشارات وقواعد المرور والسرعة القصوى وكل واحد مداير مافي راسه تقول ليسوقوا في  حلبة سباق، الكل يبي الطريق ليه طالع من فرعي يديرها جياشة ويصكر راسه ويطلع، والطريق الرئيسي ليك قانونا

سهم الأسبقة يبقص من بعيد يقول  انا شوفوني حرام عليكم  حتى العمود اللي منبتينه  فيه أطول من نشنوش باش  ميبداش عند حد سبلة يقول مشفتاش،  وهو فايته بالطويل شنو اسبقية تبصر حتى إنت أنا نخطم الأول الباقيين في نار جهنم

هذا خلي اللي يسوقوا من غير رخصة واللي جايبنلهم الرخصة بالواسطة واللي يتدربوا بلا فليورزا وهما أصلا  دون السن القانونية وبرا من هنا وغادي ولوح يمين ويسار وعادي أوراح الناس الثانية اللي تبع في القوانين رخيصة مش غالية ..

والفليتشة(  اشارة لتدل على إنك سوف تأخذ جهة اليمين أو اليسار في السيارة) معدش موضة الليبين بدو يديرو في الفيلتشة إلا في  العراس بس ،طواقة وشهدرة  لكن من يبي يدرس يمين أو يسار، أو يبي يخش زنقة متحلمش نهائي إنه يديرها لا

لازم أنت تتوقع إنه بيدرس يمين لهذا رجلك  على طول خليها في وضع استعداد على الفرينو وخلي  عيونك يرقصوا يمين ويسار لين قريب تولي أحول وأنت مركز في كل الأتجاهات تخاف ولد حرام يطلعلك  من اللي عمرهم مقرو اشارات المرور ولاعرفوها ومدايرين  اشارات بروحهم شعارها

الجياشة والسرعة ورد بالك تخليه يسبقك وحي عليك وريهم فلاحتك

فوته متعدلش عليه فوته راهو تسبق فيه

الله لاتربحهم حتى المواقع العربية شهدرو بينا فيها 50 ألف ليبي ماتوا خلال 40 عام رقم مأهول حتى لو  كان  الطاعون ولا الأيدز مقتلش منا هكي موقع إيلاف السعودي نشر الخبر ومن قريته مرة نتفكر لين شهقت للدرجة هادي  معقولة، 50 ألف ليبي لو مشوا حاربوا في فلسطين راهم حرروها وريحونا من خارطة الطريق وخارطة الدماغ وشارون وبيريز والدوشة هادي كلها(اعفس اهنا اقرأ الخبر متع 50 الف ليبي ضحايا الطرق)

كل يوم نسمع خبر فلان مات بحادث (اعفس هنا شوف في أسبوع قداش حادث مروري) 254 حادث مرور في ليبيا خلال أسبوع   تخيلوا الكارثة وين متقوللهم يقوللك الطرق متنفعش، باهي الطرق متنفعش خلونا  نجو لأقرب دولة جنبنا لاتقارن طرقها بينا تونس طرقها ضيقة ،والكوبريات فيها مش زي اللي عندنا بالكثرة، هادي ولا طرق سريعة ويخي عندهم قطارات ماشية جاية ومحترمين القانون ولا باس عليهم خيرهم هدوكا شنو مش ناس ولا شنو

مالا لو تمت شبكة القطارات في البلاد شنو بيصير نحس فيه واحد دماغه مركب يسار يصكر راسه يقول نبي نخطم والطريق مصكرة قدامه خليه والله يستاهل يموت يفك البشرية منه على الأقل يضحي بروحه مش بالناس اللي بيخش فيها..

يومها نازلة  جيهة قاعة الشعب جاية من شارع الجمهورية طبعا الطريق ليا سهم الأسبقيةواضح، جاي عمو  بسرعة صاروخ ارض طول

 يفن زي بوزنان مش معدل بكل  الحمد لله أن نمشي بسرعة مخفضة نوصل خير مانوصلش بكل

كوبري يخدموا فيه البراميل حمرررررررررررررر من بعيد مصكرين بيها طريق مخليين مسار واحد من بعيد، الطريق تخطم سيارة وحدة سرعتي 45 وهلبة يخي وواحدوراي داو نبيرا شادها كلاكس والله في خاطري قتله لو تموت ماني زايدة سرعتي ،والكوبري فيه منعطفات المفروض يفخض خير مينطح البراميل وهو وووووووووووووووووووووك نهاره اسود مش متحمل رجليا ينخصوا فيه على حادث

وموضة الأجتياز من اليمين الممنوعة حي حي تعرفوا بديت معدش نخلي في وسع جنبي بكل (باش ميطعلش واحد غبي ودماغه مصكر ويديرها)

علي قالي لازم تفكري إنه الي يسوقوا كلهم ميعرفوش  وتوقعي أي شئ

كل يوم نوصل نقول الحمد لله اللي وصلت اول منطلع نقوله فكني شر الطريق اللي  بدت معدش طريق بدي الموت يلعب فيها كل يوم

أولامس نازلة من شارع عمر المختار جاية من كوبري سوق الثلاث ومهيفة عمتكم غيداء  تاالا مستشفى الجلاء فيه طريق تنزل ومترفعش طبعا أن ماشية طول الطريق ليا اجباري غصبا عنه بالقانون ليا طالع عمك البيضا والكحلة( تاكسي  )،ومصكر راسه إنه بيطلع زدت سرعتي ودرتله الضي والمنبه باش يفهم اني نبي نمشي طول الحق صكرت دماغي  من لقيته هو بلعاني دارها بونتو فيا والله العظيم قريب خشيت فيه

وقفت قتله الطريق لمنو قالي ليك قتله شوفتني درت الضي والمنبه قالي ايه بس نحسابك بتخافي توقفي

على خاطر شورني بنت ولا شوره ري السيارة بورقتها قاعدة يقولك توة تخاف عليها ولا مش عارفة شنو قصده

( هئ  شريت سيارة جديدة نسيت مقتلكمش خبر عابر) قتله  حسبي الله ونعم الوكيل وطلعت

ومن دويت مع خوي قالي مزال شنو شوفتي مقابلكش واحد مصكر دماغه جاي في الأتجاه المعاكس لقي الطريق زحمة يبي يجتاز وانتي ماشية طول عابية  الطريق ليك،

ويلاقيك يفن تقول طيارة  اف 16 رافع قنابل(قتله نعم)

قالي ايه مالا شنو الحق مقابلنيش لكن لو قابلني انا متأكدة اني بنرفعه لمركز الشرطة ونديرله محضر بالزمزامات زيادة  لأنه هذا أكيد كان قصده يبي يقتل اللي قدامه

ليبيا في المرتبة الثانية عالميا بعد عمان في حودا ث الطرق مبروووووووووووووك أول مرة ليبيا تجيب ترتيب متقدم  عالميا بس مش لحرية الصحافة ولا للأختراعات ولا ولا لالا  في  عدد حوادث السير جابتها  الثانية

نبي نعرف ليش مزال ليبيا مركبتش كميرات مراقبة السرعةزي البلاد ات الثانية  واعطتهم المتجاوزين على قلبهم حبس وغرامة؟

وعلاش نقصت اشارات المرور ولو لقيتها تلقاها مضروبة على حموم سعدها ومعفجة نتيجة الشباب اللي لاصق إما تحت عمود  كهرباء أو عمود اشارة مرورية من الكساد والبطالة وين صيانة الأشارات؟

بعد وين باش تلقى  إشارة واضحة وباينة إما شجرة مدرقة عليها أو ممحية

السميفاروت مزال يبو صيانة حتى هما الشجر كله مدرق عليهم

الناس اللي كيف متعلمة السواقة زي حالات  واجدين  ناس

ليش ميخلهموش يحطوا علامة خلف السيارة توضح للكل إنه الشخص هذا قاعد جديد  في السواقة مرة مرة عمو كارين  الله يرحمها قتلي نحنا في امريكا نحطو في حرف L   على السيارة إجباري لمدة سنة أو ستة شهور تقريبا علشان اي حد يشوفها  ياخذ حذره من السيارة ويعرف إنه صاحبها قاعد جديد

ردت عليا أمي من دويت أنا وياها هكي قتلي والله لاما يزيدو يعقدوه ويحاولو يناشبوه زيادة(وهادي حق وصدقت منين تعلمت القيادة لسناتهم حاشكم زي الحنش طوال تلقيح دوة على الفاضي والمليان وينجن ويموت لو لقي بنت تتعلم أو تعلم فيها  بنت زيها

وحي حي لولقي بنت تسوق ينجن ويركبه 60 الف عفريت ويحاول بكل قدراته إنه يجتازها وميخليهاش تخطم صح عنده الحق تنقص من رجولته لو خلى لبنت الطريق ميجيش لازم يوري روحه  عنتر زمانه على فكرة هادي عقدة واجدين من الرجالة طبعا مش الكل  نتكلم عليهم …

 بس  تخليوا في الطريق  سيمافرو زي هذا في ليبيا تتوقعوا قداش حادث بيصير في الدقيقة الوحدة لالا قولوا الثانية الوحدة  هئ

ونبي نسأل عمو متع أمانة العدل

وين تخطيط الطرق بالأشارات الأرضية (الخط المتقطع مسموح الأجيتاز والخط المتواصل ممنوع الأجتياز ) هئ فيه ناس ميعرفوهاش تصدقوا؟؟؟؟

ولا مرةنتفكر فيها شارية لصغار خوي العاب من عمر المختار شارع الألعاب  واجدين يعرفوه المهم الشارع فيه اشارة  الشارع ممنوع يعني، ميقدرش  يخش منه في الأتجاه اللي هو فيه

،وواحد طحش طول بعرض ولابس قرواطة، خاش منه شوفته قتله مش ممنوع قدامك ترا شنو قالي وانتي شنو  دخلك وحق آيات الله غر هداك اليوم جاية على رجليا ومعاي أمي، كنهذا مخصه من  وخدة رقم طارقة وشكية فيه باش يتربى 

 

لأنه مش متربي لو متربي راهو تبع القوانين والقواعد يفرض أنا  جاية بالسيارة وبنمشي بالعكس وهو خش منها شنو وضعي أنا مشيت فها أنا واللي معاي صاحب المحل قالي هذا كل يوم هكي بنفس الكيفية

 سيارات تهيج في الشوارع بلا ستوبات خلفية  وابسط قواعد السلامة فيهم مفيش متخطمش سارة إلا  تشوف فيها اثر دعكة مع سيارة ثانية

 وامس صارلي موقف ثاني في سيمافرو شارع الزاوية توة ظان لا بيا لا عليا مطلع راسه من الروشن مبروك السيارة نديرو افاري  اللي عندي تومتيك نعطيهالك واعطيني سيارتك وراهو  سيارتي ماشية 5000 الاف ( هئ تصدقوا يسوق ويدوي ولاصق فيا وخنس عليا سيارتي مارشة مش تومتيك   ) توة هذا شنو تسموه وفوق هذا من قتله فكني شرك برا بعيد اونه معارض السيارات

غريط السيارة  وشدها سرعة قريب في  120  قدام مسشفى الحوادث (هئ المستشفى قريب هكي قلت في بالي)

 وزيدها يازايد تصكير دماغ اصحاب الميكروات ووووووووووووووووووووووووووووواك وووووووووووووووووووووواك منهم

الصورة من مدونة فاتن

مديرين قوانين بروحهم مش مع ا الناس اللي يسوقوا، ا بكل  تصدقوا مرة   الأفندي عمر الكواش  واقف في الطريق الساحلي ،في برنامج يوقف في أصحاب الإفيكوات يقوللهم شنو العلامة هادي؟؟؟

(وهي علامة إعطاء الأسبقية)وقف يجي 4 ميكروات معرفوش الأشارة راكب معاهم قاله الإجابة الصح تخيلووووووووووووووووا مركب معاه يجي 30  بني آدم أرواحهم على كف عفريت ومش عارف إشارات المرور ؟؟؟

أنا بصراحة ادعو أمانة العدل إنه تشدد من المخالفات وتبدى تخالف  مش بالدينارات بس لا بالمئات والألوفات باش  حشاكم ( ال,,,,)

اللي  يسوقوا من غير احترام الأشارات يتربوا ولا نبيهم يطبقوا عقوبة الحبس زيادة  والإعدام لو الزم الأمر

فاتحة قريب مليون عين مش هين وحدة وان شاء  الله الحال يلايم

حزام الأمان اللي تللقاه معبي غبرة في سيارات الليبين ويخي لو حاول يجبده مينجبدش من مكانه من كثر مسكين الصديد اللي معبيه

مفيش حد يبي يستعملها طلعت أمانة العدل قانون  إن الكل لازم يديرها بالك يخفضوا من   ضحايا الحواث نشوف يمين يسار نلقى الكل  فايت الموضوع مش عارفة علاش!!!!!

 الموبايل(النقال) اللي واحد من أهم اسباب الحوادث ربي خلق للأنسان دماغ واحد يفكر بيه ويركز بيه تلقى الكل حاطينه في ودانهم اللي سنونه 34 يبانوا يكلم في صاحبته في الطريق يوصفلها في الشارع واللي يهدرز بيه مع صحابه  خايف تفوته صفقة الملايين ،واللي تهدرز وتغيرفي المارشة بنفس الأيد اللي شادة بيهم الدومان (عجلة القيادة) وتتضحك تقول لا تتفرج  على قرارقوز وبرا على الحال  تبوا الحق رجا ل المرور يسخفوا فيا معدش يقدروهم عندهم حق الشعب هذا  يبي  جيش من رجال المرور ولا كاميرا مراقبة لكل واحد في سيارته

هداك اليوم أنا وبشرى في أول سبتمبر

بشرى مقررة متسوقش إلا في القايلة وعنده االحق قالت الطرق جحيم سرعة وعدم احترام قواعد المرور

 

 

شوفت 2  رجال مرور مساكين الساعة 3 الظهر القايلة  شكلهم ضاربتهم الشمس لين فايت فيهم والله سخفوني ماشيين قريب يطيحوا على وجوهمم

 

وهادي صورتهم تحية ليهم وين ماكانوا،مساكين هما يخالفوا والواسطات تخدم صح رجال المرور مش كلهم نزيهين بس الحق الأغلبية عندهم النزاهة

 

ونصيحة اللي معنده شي غير يخيط ويفصل في الزنق (تقول حناي)علاش صرف الوقود والضرر بالبيئة ريح وخيي  ريح جمالك وريح الناس من الزحمة ونقص استهلاك الطاقة شد مكانك  وخلي الطرق للناس اللي عندها مشاوير ضرورية ومش لازم حتى بتمشي لولد جيرانكم الزنقة جنبكم بالسيارة

قريب تخش للحمام بالسيارة على مقداش نخصها ساهل

ريحها السيارة مرة في الأسبوع وشدها رياضة على رجليك لمشاويرك الساهلة وهالتصطريب بطلوه(تفحيط على راي خوتنا الخليج) ريحها السيارة عيت ملت طابت نسمع فيها تقولك حرام عليك علاش هكي مدايرة فيا

والله لو يفتحوا في ليبيا حلبات سباق نلقى  الشباب كلهم غادي يلهدوا ولو خشوا 100 بيطلع منهم ممكن واحد

حي شنو هذا ياربي والله حرام

 

تلقى ناس مش لاقيين سيارة يقضو بيها مشاويرهم وناس تصطرب بيها

ونصيحة ثالثة ورابعة علاش من أنت ماشي للجامعة  مترفعش  اختك ولا خوك  معاك علاش يبدو في الحوش 4 يقروا في نفس الجامعة وكل واحد بسيارته ليش مش كلكم تمشوا في سيارة وحدة على الأقل تنقصوا زحمة هالطريق

 

 

وأخيرا معنديش إلا كلام الله نختم بيه التدوينة هادي

بسم الله الرحمن الرحيم

(وَأَنفِقُواْ فِي سَبِيلِ اللّهِ وَلاَ تُلْقُواْ بِأَيْدِيكُمْ إِلَى التَّهْلُكَةِ وَأَحْسِنُوَاْ إِنَّ اللّهَ يُحِبُّ الْمُحْسِنِينَ) (صدق الله العظيم)

 وأخيرا نهدي اشارت المرور لكل زملائي المدونين وأخوتي المتصفحين والزوار ونقوللهم بالله عليكم زيدو راجعوهم وتقيدوا بيهم وفكوكم من الموبيل ارزينا فيه مش باش تحافظوا على أرواحكم بس لا

لأن ارواح ناس ثانية راهي مربوطة بيكم وحزام الأمان لازم منه راهو يخفض الأصابات  الخطيرة نتيجة الحوادث وربي يحفظ محبي شواطئ

 

،وفيه ناس باردة تخش تمد في وجهها هنا غير مرغوب فيها نشوف فيهم ينقزو ا ويقرو ياودي تحشمو على  وجوهكم مدونتي فاضية ومنعرفش ندون علاش جايين هني بروا غادي بالك خير مندفكم تطيحوا في البير  يطلع  عرسكم غدوة.. تلقيحة على الماشي متع وحدة تقول 

توة نفضالكم هئ هئ هئ

 

. وسلامات ليكم أحبائي ومحبي شواطئ وزوراها الأعزاء

كانت معاكم غيداء التواتي من شوراع طرابلس العاصمة المعفوجة بمليون سيارة حسب تقديرات الدوائر الحكومية

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج  |   دوّن الإدراج