تحت عنوان الاعلام الليبي : يفتح ملف قضية بيع حق المواطنة للعرب والأفارقة بخمسة آلاف دينار!! بموقع المنارة  كان الخبر الذي خفف من وطأة صدمتي بخصوص هذه القضية

 بينما عزفت إذاعة الليبية والشبابية عن تناول قضايا هامة  تهم المواطن الليبي (وفاضية طول النهار تبث في أغاني من شرقاه وغرباه شنك ملعب)، وعزفت عن  حتى تناول قضايا تهم المجتمع الجماهيري التعيس( شنو رايكم مالا سعيد بعد الفضايح هادي )؟

لا أعرف حقا ماهو هدف الإعلام إن لم يخدم قضايا الوطن والمواطن(نصيحة  ديروا مقاطعة للأذاعات التافهة هادي )لأنه هدفها هو  تغييبكم عن قضاياكم ولم استمع في قنوات الليبية والشبابية المسموعة حتى الآن  لأي برامج هادفة( صعب  واجد تسجيل هدف تبيلها ملاعبي يامذيعين ويامعدين)،دأبت إذاة بنغازي على تناول  هذه القضايا بكل شجاعة(طول عمري نقول على رجال الشرق رجال والرجال قليلُ) مع إحترامي للرجال من المناطق الأخرى بس(هذا الحق)،منذ أن قرأت هذا الجريمة النكراء على صفحات المواقع ودونت  في حينها هنا في مدونتي تحت عنوان  كون ليبي ب 5000 الآلآف دينار وشلايك صهيونية في ليبيا

لا اكتمكم سرا( نوحت لين طاح  حيلي لدرجة اللي يشوفني يقولي كنهم عيونك منو عندكم متوفي )،وعلق صديق على حالتي بقوله( شنو دخلك انتي هما يعرفوا شغلهم مش راقدين ، hehehehضحكتني ياصادق )،    راقدين ونص وخمسة والله ماهو مفيقهم حتى دنقة عمي بن عمران  راقدين مادامه البلاد مفتوحة بلا ضابط ولا رابط)،راقدين مادمنا في مؤامرة تغير التركيبة السكانية راقدين ونص وخمسة وسبعة ارباع

 سألتني  صديقة قائلة ( خيرك غيود؟)

كانت إجاباتي (ليبيا ضاعت)،ولم تكن لديا رغبة في ذلك اليوم لمضي لعملي أو  القيام بأعباء المنزل لقد أصبت بحالة  ذهول وصدمة كون هناك من يستبيح هذه الأرض ويحاول التغيير الديموغرافي فيها ،ووضعت على صفحتي الشخصية على الفيس بوك في تحديث لحالتي(قداش انتي رخيصة ياليبيا) وكانت هذه التعليقات منالأصدقاء في قائمتي :_

علقت د.ج بالآتي ياخوفي ياغيداء ايقولوا ادفع 5000 كان تبي نسحبوا منك هويتك الليبيه …عادي ياغيداء ماهو احنا ناقصين سكان وقاعدين بروحنا وعندنا شقق هلبا واراضي زايده اندوروا من يسكنها مش مشكله عموما اللجنه الشعبيه العامه لازالت تأتي بالجديد بس استني ربي يستر
احنا اصلا وزرائنا كلهم محتاجين لقرار بالتعديل بس بشرط ب5000
حسبي الله فيهم لا خلو فلوس لاناموس

وعلقت منال بقولها ابدينا ارخاص احني الليبين حتى في التزيف
لاحول ولاقوة الا بالله

وقمت بالرد على من شاركوا النقاش :(رخصوا بلادنا وباوها رخيص والله شوية فيهم شنق في ساحاتا عامة هادو اللي خانوا الوطن والأمانة والله لو يعاودو التعداد يلقونا مفتناش 3 مليون حي حي حي حيييييييي ليا يومين نبكي والله العظيم الناس يحسبوني الا اشبح خيرني راني واجعني هكي 5000 دينار ثمن الجنسية الليبية ياربي لطفك وعفوك واحمي هالبلاد قولو آمين

بينما  استطر أحدهم قائلا(يرجعوا لتعداد 54 أو 68 ميلادية)

وبينما استطرد صديق مدون على صفحتي قائلا:_

(يا أختي ليش تحاحي هكي وكأن الموضوع جديد؟ هذا خطأ فردي ويمكن علاجه باعتراف المتهمين وتجريد المزويرين من الجنسية ، هذا بالنسبة للواقعة اللي سردتيها في مقالك ، لكن مشكلتنا أعمق من واقعة واحدة ، أعتقد أن الجنسية الليبية تسلل لها عدد كبير من المتسللين منذ زمن طويل وإلا كيف هكي وفجأة انتقلنا من 3 مليون إلى 6 مليون ونصف في ظرف 10 سنوات؟ خاصة وإذا علمنا أن نسبة حالات العنوسة في ليبيا مرتفعة وأن نسبة الشباب العزاب كبيرة؟ يعني الموضوع أكبر من 5000 آلاف دينار)

وبينما علق كاتب ومدون معروف  قائلا(ههههه تحسابو حل تعداد 68 وماقبله الصحاح ديرين حساب لكل شي والله خايف أنهم تلقوهم قدامكم في هالتعداد واللي حضر صح بره ؟؟؟)

وقمت بالرد مرة أخرى قائلة(اي توقع حق لكن لازم من حل للأشكالية هادي لازم من حل جذري مراقبة السجلات المدنية مراقبة أمنية مشددة وتشديد العقوبات حتى للأعدام لتكون رادع لمن تسول له نفسه بيع وطنه)

وعلقت مدونة صديقة بقولها مقيوله .(.. هذه ليبيا يا سادة ومن ليبيا يأتي الجديد … حسبي الله ونعم الوكيل توا هكي أصبحنا أرخص من الشلايك للي جابوهم من الصهاينة .. هانت عليهم الجنسية وحق المواطنه .. معك حق يا غيداء مش عنصرية ولا كره للعرب ولا غيرهم بس حقنا اننا نحافظ على هويتنا الليبية .. بس تعرفي هما بجنسياتهم افارقة وعرب مش محصلين الليبين معاهم حاجة فمابالك اصبحوا ليبين وليهم…)

وتساءل مدون وشاعر  قائلا ( أمين اللجنة الشعبية العامة للأمن العام .. يصدر تعليمــــاته للإدارة العـــامة بالبحـــث الجنـــائي بضرورة ضبط المتهمين.. والمحــــامي العـام يرجىء ضبــط المتهمــين إلى حـين؟! ) ..
عفوا .. ماهي مبررات المحامي العام بشأن إرجاء ضبط المتهمين ودوافع هذا الأجراء ؟

بينما ترك أحدهم تعليقا  معبرا عن الحالة((حترامي للحرامي !!!!!!!!!))

وترك مواطن من مدينة صبراتة التعليق التالي(خلاص وطننيه معاش فيه ولا خوف على البلاد كلهم ينهشو فيها من جميع الجيهات)

بينما ردت عليه بنت ليبيا قائلة(you are 100% right)

 أكثر ما آثارني هو اتصال صديق بوالده الذي تربطه صداقة بأمين العدل في محاولة منه لمعرفة ماهي الإجراءت التي أتخذت في الموضوع وأجابني الصديق إن السيد الأمين في مأتم(أكيدة مأتم ليبيا ماهي ماتت وشبعت موت)(  المفروض قالونا مشينا عزينا) السيد الأمين لو كنت في مكانك لم نمت ولا غمض لي جفن إلا بعد إتخاذ أجراءت رادعة وإصدار أوامر بفرز السجلات المدنية قاطبة ولو كلف ليبيا ذلك المليارت(شنو خسارة في ليبيا ولا شنو)؟ والمشين والمخزي هو إرجاء مكتب المحامي العام التحفظ على المتهمين(حسبنا الله ونعم الوكيل ) (المفروض يتحفظوا عليك حتى إنت لأنك متآمر معاهم ياعارك ويافضحيتك بالك حتى انت كتيبك مزور!!)

حقا لا أعلم كم عصابة موجودة في مكاتب السجلات المدنية وخصوصا تلك المناطق النائية التي لايتم  مراقبتها جيدا ولا اعلم كم ليبي مزور في ليبيا ولكن تابعوا معي جيدا تعليق أحد الأصدقاء على الفيس بوك عبارته منطقيا صحيحة( أعتقد أن الجنسية الليبية تسلل لها عدد كبير من المتسللين منذ زمن طويل وإلا كيف هكي وفجأة انتقلنا من 3 مليون إلى 6 مليون ونصف في ظرف 10 سنوات؟ خاصة وإذا علمنا أن نسبة حالات العنوسة في ليبيا مرتفعة وأن نسبة الشباب العزاب كبيرة؟ يعني الموضوع أكبر من 5000 آلاف دينار) فعلا كيف ولينا 6 مليون (فضيحة فضيحة فضيحة)

الموضوع أكبر من هذا الموضوع يتمثل في الآتي إن صلح رجال الشرطة صلح الوطن وبينما يدخل كليات الشرطة كل فاشل أو فاشلة في دراستها ويعتبرونها الحل الأخير (نولي ضابط في 4 سنوات ويحطوني في منفذ ولا في مكان ويبدا الفساد) إني اشدد على إن كلية الشرطة من المفترض إن لا يدخلها إلا من هم من ذوي المعدلات الممتازة فقط وعلى  الذي يرغب في الدخول لكلية ان يستعد للتوقيع على شروط إحداها هو نيل عقوبة الإعدام إن ضبط في قضية فساد

الفساد الفساد يابلادي ياحرة الفساد الفساد يابلادي ياحرة  الفساد اللي خلانا في مقدمة قوائم التصنيف االعالمي ( افرحوا ليبيا أخيرا في مقدمة القوائم)(مش في اختراعات ولا حريات ولا في إنجاز علمي لا في نسبة الحوادث والفساد) وأخيرا لديا كلمة

على جميع الليبين مقاطعة قنوات الليبية والشبابية المسموعة التي  لم تقدم للمواطن سوى(هز الوسط ورقصني ياعم وياحبيبي أنت فين وأنا مش قادر نفوتك يابوعجيلة) وسيلي كان الدمع يرده ياعين وآه وآه وآه واما نعيمة نعمين  خلي  مسعود يكلمني ،وان هيفا انا مين قدي انا انا مسعودة أنا )

وعزفت عن تناول مواضيع  مهمة وتوعية للمواطن بخصوص قضايا مثل هذه ،وعدم اتباع خطوات فعالة في الحث على تنمية الشعور الوطني(المخبش ليه مدة)،وعدم بث اي إرشادات  للحفاظ على البيئة و بينما تبث القناة  (ياوخيتي كان نعرف ماكلتك شو تديريلها ) (والسموح مرتاح لانه يستعمل حفاظات سي المنجي) لجني الأموال(خلو عندكم دم واحساس وشوية لله وشية لعبد الله (مش ديما شادينها دعايات فلقتونا بيهم )، ومريحين الشباب في كلمة  حبني ونحبك ووينك ياحياتي، وبرنامج من نوع فش قلبك ، وياسركم فلاحة ديروا حاجة للبلاد اعطيم سحيقة تسحقكم

والهو بقضايا الوطن راهي هادي ليبيا اللي دفع فيها الأجداد والآباء دماء غالية ولا يزال أسماء أبناء  عمومتي مسطرة بدماء من نور في جنوب الكفرة (

 وتصبحون على وطن يا أبناء الوطن